ТАҶЛИЛИ «РӮЗИ ФАЛАК» ДАР НОҲИЯИ ДАНҒАРА ФАЛАК ҶУЗЪИ ҚАВИИ ФАРҲАНГИ ТОҶИКОН АСТ!

08 октябри соли 2019 дар Муассисаи давлатии Қасри фарҳанги ноҳия чорабинии фарҳангиву маърифатӣ бахшида ба «Рӯзи фалак» бо иштироки намояндаги Ҳукумати Ҷумҳурии Тоҷикистон Раиси вилояти Хатлон Қурбон Ҳакимзода, Вазири фарҳанги Ҷумҳурии Тоҷикистон Шасиддин Орумбекзода, Раиси кумитаи телевизион ва радиои назди Ҳукумати Ҷумҳурии Тоҷикистон Маҳмадсаид Шоҳиён ва Раиси ноҳияи Данғара Раҳмон Исломиддин Хайриддин баргузор гардид.

Дар саҳни Қасри фарҳанг меҳмонон аз дастовардҳои замони Истиқлолият ва намоиши ҳунарҳои мардумӣ бахшида эълон гардидани солҳои 2019-2021 «Солҳои рушди деҳот, сайёҳӣ ва ҳунарҳои мардумӣ» дидан намуда, бо ҳунармандони ноҳия аз наздик шинос шуданд.

Сипас Раиси вилояти Хатлон Қурбон Ҳакимзода тамоми аҳли заҳматкаши ноҳия ва кулли мардуми сарбаланди вилоятро бо ин санаи таърихи табрик намуда, иброз намуданд, ки бо Фармони Президенти Ҷумҳурии Тоҷикистон аз соли 2007-ум бо мақсади ҳифзи мероси бадеию фарҳангии халқ ва рушду такомули ҳунари фалаксароӣ ҳар сол 10-уми октябр «Рӯзи Фалак» дар сар то сари кишвар ҷашн гирифта мешавад.

Санъати мусиқии халқи тоҷик таърихи бостонӣ ва рангину пурғановат дорад, ки имрӯз дар муҳити нави рушди санъат анъанаҳои беҳтарини он идома доранд ва бо тобишҳои тоза ҷаҳони маънавӣ ва завқи зебописандии муосиронро сайқали тоза мебахшанд.

Дар ин радиф Фалак аз зумраи ганҷинаҳои бебаҳое мебошад, ки аз қаъри асрҳо то замони мо ҳамчун мусиқии классикии халқи фарҳангпарвару санъатдӯсти мо ба ёдгор мондааст.

Рушду пешрафти фарҳанги миллӣ ва муаррифӣ намудани он ба ҷаҳониён яке аз паҳлуҳои муҳими сиёсати давлати соҳибистиқлоли Тоҷикистон ба шумор меравад.

Барои нигоҳдошт ва ҳифзу инкишофи дастовардҳои фарҳангии хеш дар миқёси умумибашарӣ мардуми тоҷик низ саҳми беандоза гузоштааст.

Маҳз заҳматҳои фарзандони фарзонаи миллат буд, ки тавонистанд мероси фарҳангиву таърихии халқи хешро, новобаста аз тазодҳои замона ҳифзу нигаҳдорӣ намоянд ва бар замми куҳанбунёд будан, таърихи бою пурғановати хешро ба ҷаҳониён муаррифӣ намоянд.

Ҳамчун зикр гардид, ки бо супориши Президенти мамлакат, Ҷаноби Олӣ муҳтарам Эмомалӣ Раҳмон ва тибқи қарори раиси вилоят аз 10-уми марти соли 2004 дар назди Раёсати фарҳанги мақомоти иҷроияи ҳокимияти давлатии вилоят ансамбли «Фалак» ташкил карда шуд, ки имрӯз фаъолияти пурсамар дорад.

Имрӯзҳо бо дастгирии бевоситаи Пешвои муаззами миллат муҳтарам Эмомалӣ Раҳмон, Ҳукумати Ҷумҳурии Тоҷикистон ва мақомоти иҷроияи ҳокимияти давлатии вилоят ва шаҳру ноҳияҳо жанри мусиқии суннатии миллӣ рушду нумӯъ ёфта, таҳкимбахши фарҳанги миллӣ мегардад.

Дар анҷоми суханронӣ Қурбон Ҳакимзода
бори дигар санаҳои фархундаи Рӯзи Фалакро ба ҳамаи ҳамдиёрон муборакбод гуфта, хушбахтию шодкомӣ ва саодати рӯзгорро таманно намуданд.

Сипас баҳри болидахотирии иштирокчиёни чорабинӣ барномаи рангини консертӣ бо иштироки устодони фалак ва сарояндаи маҳбубу шинохтаи мамлакат пешкаши ҳозирин карда шуд.