Бо мақсади иҷрои дастуру ҳидоятҳои Асосгузори сулҳи ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати беҳтар намудани сатҳу сифати хизматрасонӣ ва баланд бардоштани касбияти масъулини нуқтаҳои хизматрасонӣ ба меҳмонон ва сайёҳони кишвар, Кумитаи рушди сайёҳии назди Ҷумҳурии Тоҷикистон дар ҳамкорӣ бо Ассотсиатсияи тарабхонадорони Тоҷикистон ва Донишгоҳи байналмилалии сайёҳӣ ва соҳибкории Тоҷикистон курсҳои омӯзишии кутоҳмуддат ташкил менамояд.
Аз рӯи нақша курси омӯзишӣ дар се марҳила фаро гирифта мешавад.
Марҳилаи якуми курси омӯзишӣ дар шакли назариявӣ дар мавзӯи «Хизматрасонӣ дар тарабхонаҳо» оид ба тарзи дурусти хизматрасонӣ, асосҳои меҳмоннавозӣ, хизматрасонӣ дар самти хӯроки умумӣ ва этикаи меҳмондорӣ баргузор карда мешавад.
Марҳалаи дуюми курси омӯзишӣ дар шакли амалӣ дар мавзӯӣ «Маҳорати кулинарӣ (пухтупаз)» оид ба усулҳои пухтупаз, истилоҳот, таркиби таомҳо, асосҳои омода кардан ва ороиш додани хӯрокҳо ва хуришҳо, инчунин намунаҳои ташкили меню барои тарабхонаҳо баргузор карда мешавад.
Марҳалаи сеюми курси омӯзишӣ шакли таҷрибавӣ дошта, барои мустаҳкам намудани малакаи пешхизмат, ошпаз ва маъмурон, инчунин ташаккули равишҳои эҷодӣ ва тадқиқотии донишҷӯён ба фаъолияти касбӣ ва ташаккули малакаҳои таҳлил нигаронида шуда, ҳар як коромуз вобаста ба ҷойи истиқомат ба таҷрибаомӯзӣ равона карда мешавад,
Бояд қайд кард, ки давраҳои якум ва дуюми омӯзиш дар маҷмӯъ 92 соатро ташкил дода, дарсҳои назариявӣ ва амалӣ аз ҷониби мутахассиси маркази таълимии Cronwell Hospitality Group ҷаноби Сергей Соловев аз шаҳри Санкт-Петербурги Федератсияи Россия гузаронида мешавад.
Барои маълумоти муфассал ба саҳифаи мо ё ба почтаи электронии шуъбаи рушди сайёҳӣ (rushdisayohi@mail.ru) муроҷиат кунед.
Ҷойҳо барои иштирок дар курси омӯзишӣ маҳдуданд.
